Noticias

O Cidade de Narón cae pola mínima na Gándara ante o Ribeira FS

  • Os naroneses non tiveron a sorte de cara e acabaron caendo por 2-3 logo de dous erros no treito final do partido

Narón, 25 de novembro de 2023.- Xornada aciaga para o Cidade de Narón que caeu na Gándara por 2-3 ante o Ribeira FS cando tiña encarrilado o encontro grazas aos tantos de Juan e Diego Vázquez. Dous erros no treito final do partido condenaron aos naroneses a xogarse os 3 puntos coa estratexia de porteiro-xogador pero sen sorte e malia dispoñer de varias ocasións claras de gol.

O encontro comezou cun Ribeira firme en defensa e un Cidade cun ritmo de traballo intenso que aguantaba ben as arremetidas dos visitantes. Unha tónica que rachou co gol de Juan mediado o primeiro tempo, logo dunha boa estratexia de falta.

Co marcador de cara, o Cidade se acomodou na cancha pero nunha xogada illada o Ribeira empatou o encontro grazas a un gran tiro de Quintela que entrou por toda a escuadra da portería naronesa.

O primeiro tempo acabou cos dous equipos moi intensos en defensa e xogando ao límite por mor da acumulación de faltas. E con varias ocasións para ambos que tanto Arenas no equipo visitante como Fer Combarro no local desbarataron para manter ao seus equipos no partido.

O segundo tempo arrancou cun Cidade plantado en media cancha e especulando co resultado mentres que o Ribeira levaba o peso do xogo. E chegaron as ocasións para os locais con varios man a man de Álex Naveira e Lucas que non converteron e un golazo de Diego Vázquez desde fóra. O Ribeira tamén dispuxo dunha boa ocasión cun tiro ao pao.

Pero se algo fixo cambiar o sino do encontro foi o gol en propia porta de Guille no minuto 28, logo dunha falta ao bordo da área e un despexe que pegou no xeonllo do xogador naronés para acabar no fondo das mallas. Un tanto que subiu ao marcador e que obrigou aos xogadores amarelos a ir a polos tres puntos. E malia a dispoñer de varias superioridades en ataque o Cidade non foi capaz de convertelas en tantos. E nesas andaban os amarelos cando chegou o terceiro do Ribeira obra de Javi tras un mal despexe de Buxía.

Dúas accións illadas que puxeron aos de Narón por debaixo no marcador e que os obrigaron a asumir máis riscos se cabe recorrendo ao xogo de porteiro-xogador. Catro minutos intensos con boas ocasións de Diego, Lucas e Juan que non souberon aproveitar. E tres puntos que se escaparon da Gándara e que fan que o Cidade rebaixe as súas expectativas na táboa clasificatoria.

Ao remate do partido, Javi Albes resumía o choque entre dous equipos “moi parellos, con experiencia en categorías superiores, intenso e pouco lucido pero con moito traballo e onde a mala sorte se aliou co Cidade para impedirnos sumar tres puntos moi importantes na casa”.

A vindeira xornada, o Cidade de Narón viaxará a Guitiriz para enfrontarse a O Korreo de Christian Díaz.

Ficha técnica:

Cidade de Narón: Fer Combarro, Diego, Juan, Pablo e Guille . Tamén xogaron Álex Naveiras, Luis, Álex Piñón, Lucas, Diego Rey e Buxía.

Ribeira FS: Arenas, Cisco, Quintela, Pablo Díaz e Antón. Tamén xogaron Fran, Javi, Christian, Losada, Illi e Gabri.

Goles: (1-0) min. 10, Juan Caínzos; (1-1) min. 11, Quintela; (2-1) min. 21, Diego Vázquez; (2-2) min. 28, Guille (PP); (2-3) min. 35, Javi.

Árbitros: Eloy Bello e Saúl Cabo (C.T.A. Galego).

Pavillón: PM da Gándara (Narón)

O Cidade deixase tres novos puntos en Outeiro de Rei

  • Os naroneses, que acusaron falta de intensidade no segundo tempo, a piques estiveron de empatar o encontro nos últimos compases pero sen fortuna e acabaron caendo por 5-3

Narón, 18 de novembro de 2023.- O Cidade de Narón deixouse tres novos puntos, esta vez no choque correspondente á décima xornada ante o Outeiro de Rei. Os naroneses chegaron ao descanso cunha vantaxe pola mínima, sen embargo a falta de intensidade defensiva nos primeiros minutos do segundo tempo acabaron condenando aos amarelos que perderon por 5-3. Os tantos dos naroneses saíron das botas de Álex Naveira, Lucas e Brais.

A primeira parte arrancou cun Cidade ben plantado na cancha e moi acertado en defensa e un Outeiro de Rei cun xogo moi directo en ataque a través do seu pivot. A intensidade e velocidade nos desprazamentos dos locais fixeron que o Cidade sufrira máis do que debera ao inicio do partido. De feito, o Outeiro deu o primeiro aviso cun tiro de José López ao traveseiro. Unha xogada que espoleou aos naroneses, que logo dispuxeron de varias oportunidades claras para abrir o marcador: a primeira, un man a man de Lucas que non definiu; logo viría un tiro de Guille que chapou o porteiro local, e, de seguido, unha boa acción de Naveira que tampouco conseguiu materializar.

Os locais responderon cunha boa acción á saída dun saque de esquina que foi desbaratada por Fer e, a continuación, chegou o tanto naronés, grazas a unha boa contra que rematou Álex Naveira. Con vantaxe por 0-1 no luminoso se chegou ao tempo de descanso.

No segundo tempo, o Outeiro saíu con moito máis ritmo e malia que o Cidade semellou manter o control defensivo, un tiro exterior de Óscar puxo o empate. E, a penas, un minuto despois, unha saída desafortunada do porteiro naronés, permitiu aos locais poñerse por diante no marcador. Dous tantos que precederon aos que logo anotaron Óscar de novo e David nuns primeiros minutos da segunda parte para esquecer.

Así as cousas, ao Cidade non lle quedou outra que ir a polo partido e a falta de dez minutos os naroneses apostaron polo xogo de cinco para catro. Unha estratexia que axiña deu os seus froitos, xa que dous bos tantos de Lucas dentro da área e Brais desde o borde dun punteirazo, achegaron aos de Narón no marcador.

O Cidade de Narón dispuxo dalgunha que outra ocasión para empatar o encontro pero un balón en longo que non conseguiu controlar Pablo Cotelo facilitou o quinto tanto dos locais.

Ao remate do partido, Javi Albes apuntou “á falta de tensión defensiva do arranque do segundo tempo”- como a principal causa da derrota naronesa, ante un “bo” Outeiro de Rei.

O vindeiro sábado os amarelos xogarán na casa ante o Ribeira FS.

Ficha técnica:

Outeiro de Rei: Antonio, José López, Óscar, Diego e David. Tamén xogaron Arturo, Brais, Rodrigo, Edu, Pablo e Mauro.

Cidade de Narón: Fer Combarro, Luis, Diego, Brais e Pablo. Tamén xogaron Álex Naveiras, Lucas, Juan Caínzos, Guille e Diego Rey.

Goles: (0-1) min. 19, Álex Naveira; (1-1) min. 28, Óscar; (2-1) min. 28, David; (3-1) min. 29, Óscar; (4-1) min. 30, David; (4-2) min. 35, Lucas; (4-3) min.37, Brais; (5-3) min. 38, Mauro .

Árbitros: Franco Alvaro Campagnoli e Nicolás Villegas(C.T.A. Galego).

Pavillón: PM Outeiro de Rei (Outeiro de Rei)

O Cidade rompe a súa racha de vitorias ante un Pazos máis efectivo

  • Os xogadores naroneses non foron quen de rematar un encontro no que comezaron marcando e que ademais deixou as lesións de Guille, Brais e Iván

 

 

 

 

 

 

Narón, 11 de novembro de 2023.- O Cidade de Narón rompeu este sábado a súa racha de vitorias e acabou caendo ante un Pazos de Borbén que, sen xerar grandes ocasións, resultou máis efectivo nos metros finais. Os xogadores amarelos comezaron marcando a través do tanto que anotou Álex Naveira no minuto 7 e malia que gozaron de abondosas ocasións ao longo dos 40 minutos de xogo non foron quen de rematar o choque. O partido finalizou co marcador de 1-3 e coa mala nova das lesións de Guille, Brais e Iván.

O partido tivo unha tónica única nos dous tempos nos que o Cidade traballou máis en presión alta e Pazos agardou en media cancha. Cada equipo tentou empregar as súas armas e malia que os naroneses se adiantaron no marcador a través do gol de Naveira tras unha boa contra, un erro na saída de balón primeiro e unha falta próxima ao bordo da área despois puxeron aos ourensás por diante no marcador.

Logo do descanso e coa vantaxe ao seu favor, Pazos gañou en confianza. Mentres, o Cidade tentouno de todos os xeitos ata que acabou por recorrer á estratexia de porteiro-xogador coa que dispuxo de ocasións claras que non soubo materializar. Nos últimos segundos de partido, Pazos remataba o encontro cun tiro a porta baleira co que poñía o 1-3 definitivo.

Ao remate do encontro, o adestrador naronés lamentaba “que se nos teñan escapado tres puntos importantes para afianzarnos nos postos de cabeza nunha liga que se amosa moi igualada”.

Ficha técnica:

Cidade de Narón: Fer Combarro, Luis, Diego, Pablo e Brais. Tamén xogaron Álex Naveiras, Lucas, Iván, Juan Caínzos e Buxía.

Pazos de Borbén: Mera, Simón, Diego, Fredo e Martín.Tamén xogaron Amoedo, Luis, Jorge, Pablo e Xandre.

Goles: (1-0) min. 7, Álex Naveira; (1-1) min. 10, Luis; (1-2) min. 17, Martín; (1-3) min. 40, Fredo.

Árbitros: Álvaro Cambeiro e Sergio López (C.T.A. Galego).

Pavillón: PM da Gándara (Narón)

O Cidade de Narón tráese os tres puntos da súa visita a Barreiros

  • Os xogadores de Abel Cernadas continúan coa boa dinámica das últimas xornadas e vencen con comodidade ao Praias por 2-5 con goles de Brais (2), Lucas, Cotelo e Álex Naveiras

 

 

 

 

 

 

 

 

Narón, 4 de novembro de 2023.- O Cidade de Narón venceu con comodidade ao Praias de Barreiros no choque que os enfrontou esta fin de semana a domicilio. Os pupilos de Abel Cernadas controlaron o xogo desde o primeiro minuto de partido e axiña abriron brecha no marcador grazas aos tantos anotados por Brais, Cotelo e Lucas. O segundo tempo non fixo máis que afianzar a vitoria dos naroneses, que remataron o partido cun marcador de 2-5.

O encontro comezou cun Praias de Barreiros con grande intensidade no xogo e posesións de balón moi longas, pero con pouca profundidade. Os naroneses, pola súa banda, comezaron de menos a máis, defendendo ben as longas posesións dos locais. Pero coa segunda rotación do equipo naronés, na que entraron Brais, Lucas, Álex Naveiras e Juan Caínzos, aumentou o ritmo do xogo. O tándem formado polo capitán amarelo e Lucas resultou letal e dúas boas combinacións permitiron ao 11 naronés anotar os dous primeiros tantos do partido logo de dúas grandes finalizacións. A primeira chegaba no minuto 6 dentro da área local, picándolle o balón ao porteiro do Barreiros na súa saída; e a segunda, tres minutos despois, cun gran tiro lateral ao segundo pao.

Cidade xogaba con intensidade, movía o banco e o Barreiros non lograba achegarse á meta de Fer Combarro malia que o intentou a base de estratexia pero tamén de tiros exteriores sen moito perigo. E no minuto 14, Pablo Cotelo anotou o terceiro tanto naronés tras controlar un tiro en longo e mandar o balón ao fondo das mallas locais.

Co marcador a favor, o Cidade gañou en confianza e no minuto 17 Lucas, nunha boa acción individual en banda poñía o 0-4 no luminoso de Barreiros grazas a un gran tiro coa perna esquerda. Un marcador a favor dos naroneses co que se chegou ao descanso.

O segundo tempo tivo outra tónica. O Praias de Barreiros resultou máis incisivo no xogo a través de accións individuais e varios tiros exteriores de Semedo con moito perigo para un Cidade que non amosaba a fluidez do primeiro tempo. Volveron as posesións longas sen a penas faltas, poucas perdas de balón e tamén poucos contraataques, o que provocou que o Narón se acomodase en media cancha.

O Praias apostou entón pola estratexia de porteiro-xogador que traballou moi ben e que lles permitiu dispoñer de varias ocasións claras que Fer desbaratou mantendo ao seu equipo a cero. Ata que un gran tiro exterior de Semedo no minuto 35 puxo o 1-4 no marcador e obrigou aos naroneses a subir a defensa e a presión para incomodar aos locais e que non se achegaran máis no marcador. E axiña chegaron os froitos, xa que un minuto máis tarde unha boa combinación entre Diego e Álex Naveiras permitiu a este último anotar o 1-5.

Praias seguiuno intentando con 5 para 4 pero o Cidade non se escondeu e presionou o xogo de superioridade dos locais ata que nunha xogada con varios rebotes dentro da área naronesa, Jairo marcou o segundo tanto dos locais.

Os últimos dous minutos de partido logo do tanto do Barreiros se xogaron sen moitos sobresaltos e o marcador final de 2-5 reflectiu a superioridade naronesa. Un Cidade de Narón que xestionou a súa eficacia de cara a porta no primeiro tempo e que se trae tres puntos moi importantes para manterse unha semana máis nos postos de cabeza.

Ficha técnica:

Praias de Barreiros: José Luis, Aarón, Semedo, Miguel e Christian M. Tamén xogaron Adelson, Borja, Isaías, Jairo e Sergio.

Cidade de Narón: Fer Combarro, Luis, Diego, Pablo e Guille. Tamén xogaron Álex Naveiras, Lucas e Juan Caínzos.

Goles: (0-1) min. 6, Brais; (0-2) min. 9, Brais; (0-3) min. 14, Pablo; (0-4) min. 17, Lucas; (1-4) min. 35, Semedo; (1-5) min. 36, Álex Naveiras; (2-5) min. 38, Jairo.

Árbitros: Adán Cabo e Carlos Jesús González (C.T.A. Galego).

Pavillón: PM de Barreiros (Barreiros)

O Cidade de Narón desfruta dunha nova vitoria ante o Baiña FS

  • Os locais volveron sumar +3 logo dun gran traballo de todo o equipo con goles de Diego Vázquez, Guille e Iván

 

 

 

 

Narón, 28 de outubro de 2023.- O Cidade de Narón sumou tres novos puntos ao seu caixón logo de impoñerse por 3 tantos a 2 ao Baíña FS no encontro disputado esta fin de semana na Gándara. Os naroneses realizaron un partido moi completo e malia que no segundo tempo os de Javier Vidal pisaron o acelerador, finalmente a vitoria caeu do lado do Cidade con tantos de Diego Vázquez, Guille e Iván.

O partido arrancou cun Narón que desfrutaba do control do xogo mentres que o Baíña, en media cancha, agardaba a ocasión de saír con balóns en longo. Os naroneses o tentaron de todos os xeitos, con moitas e moi boas oportunidades, como o tiro ao traveseiro de Luis ou os man a man de Iván… pero o porteiro visitante repeleu todos os tiros dos naroneses. E na portería contraría, Fer a penas se tivo traballo. Co marcador a cero se chegou ao descanso.

No segundo tempo o Cidade tentou poñer terra de por medio pero non foi quen de facelo ata que no minuto 25 Diego Vázquez anotou o primeiro. Cando semellaba que o Cidade tiña o control do partido, chegou o tanto do Baíña, obra de Rodri, que bateu de tiro cruzado a Buxía.

A partir dese momento, os naroneses tentaron recuperar a vantaxe no marcador pero un novo tanto, a penas un minuto despois, puxo ao equipo visitante por diante. E o Cidade, lonxe de baixar os brazos, imprimiu máis intensidade ao seu xogo, recuperou o traballo co pivot e nunha gran acción individual, Guille conseguiu bater a Pedro.

O empate a dous tantos no luminoso naronés aguzou ao Cidade que subiu a intensidade do seu xogo mentres que o Baíña se pechou en defensa aguantando as arremetidas locais.

Esa grande intensidade de xogo por parte dos dous equipos no segundo tempo fixo que ambas escuadras acumulasen cinco faltas. Pero a balanza se inclinou do lado naronés, xa que a sexta falta dos visitantes a falta de 8 segundos para o pitido final, permitiu a Iván poñer o 3-2 definitivo. Tres puntos que se quedan na casa, grazas ao gran traballo despregado polos xogadores de Abel Cernadas ante un Baíña que tamén disputou un bo encontro.

Con esta nova vitoria, os naroneses se manteñen na parte media alta da táboa clasificatoria. A vindeira xornada viaxarán a terras luguesas para xogar contra o Praias de Barreiros.

Ficha técnica:

Cidade de Narón: Fer Combarro, Luis, Diego Vázquez, Pablo e Guille. Tamén xogaron Buxía, Álex Naveira, Alejandro Piñón, Lucas, Iván, Juan e Diego Rey.

Baiña FS: Pedro, Rodri, Víctor, Ismael e Fran. Tamén xogaron Diego, Javier e Sergio.

Goles: (1-0) min. 25, Diego Vázquez; (1-1) min. 26, Rodri; (1-2) min. 27, Javier; (2-2) min. 29, Guille; (3-2) min. 39, Iván.

Árbitros: Adrián García López e Sergio López Ramudo (C.T.A. Galego).

Pavillón: PM A Gándara (Narón)

O Cidade de Narón acada unha valiosa vitoria ante o 5 Coruña FS

  • Os naroneses gañaron 2-4 con tantos de Álex Naveira, Iván, Guille e Lucas e unha férrea defensa

Narón, 22 de outubro de 2023.- O Cidade de Narón se fixo esta fin de semana coa vitoria no cara a cara que o enfrontou ante o 5 Coruña FS. O partido, celebrado no pavillón San Francisco Javier, rematou cun marcador final de 2-4 grazas aos goles anotados por Álex Naveira, Iván, Guille e Lucas. Tres puntos que lles serven aos de Abel Cernadas para auparse ata o quinto posto da táboa clasificatoria.

O encontro comezou cun claro dominio dos naroneses, que levaron o peso do xogo grazas a unha presión alta e a numerosos roubos de balón. Sen embargo, a acumulación de faltas cando apenas se chegara ao ecuador do primeiro tempo obrigou ao equipo amarelo a retrasar a defensa a media cancha e rebaixar a intensidade da presión. Unha situación que lonxe de afastar as posibilidades do Narón de xerar ocasións de gol, provocou que no minuto 9 Álex Naveira abrise a lata e anotase o primeiro tanto.

Malia o dominio naronés axiña se igualou a balanza e dous minutos despois do gol do Narón, Luis M conseguiu o empate dun rexeite dun tiro afastado. Con empate a un tanto chegou o descanso ao polideportivo coruñés.

O segundo tempo non arrancou ben para os xogadores do Cidade, moi desconcentrados e imprecisos en defensa. Situación que o equipo local soubo aproveitar para adiantarse no marcador no minuto 26 por medio de Pablo Roade.

Este segundo tanto do 5 Coruña serviu para espolear ao equipo naronés que comezou a conectar ben co xogo de pivot e a xerar abondosas ocasións. Ata que no minuto 34 Iván anotou o gol do empate a pase de Lucas. Un tanto que deu moitísima confianza ao seu equipo e que provocou que no 35 Guille anotase o 2-3 cun tiro afastado. E un minuto despois foi Lucas, logo dun roubo de balón, o que bateu cun forte disparo por riba ao meta coruñés.

O 5 Coruña tentou recortar distancias con xogo de cinco para catro que os naroneses souberon defender á perfección.

O vindeiro fin de semana A Gándara acollerá, a partir das sete da tarde, o choque entre o Cidade e o Baiña FS.

Ficha técnica:

5Coruña FS: Jorge, Marco, Víctor, Jairo e Luis M. Tamén xogaron Diego, Daniel, Álvaro, Pablo Roade, Pablo Martínez e Yerai.

Cidade de Narón: Fer Combarro, Luis, Diego Vázquez, Pablo e Guille. Tamén xogaron Buxía, Iván, Lucas, Álex Naveira, Brais e Diego Rey.

Goles: (0-1) min. 9, Álex Naveira; (1-1) min. 11, Luis M.; (2-1) min. 26, Pablo Roade; (2-2) min. 34, Iván; (3-2) min. 35, Guille; (4-2) min. 36, Lucas.

Árbitros: Saúl Cabo González e Rafael Alberto Tovar Rodríguez (C.T.A. Galego).

Pavillón: PM San Francisco Javier (Coruña)

O Cidade de Narón suma tres puntos na casa ante o Sport Sala Culleredo

  • Os xogadores naroneses tiveron o control do partido dende o primeiro minuto de xogo e aproveitaron o seu dominio para vencer por 6-1 con goles de Pablo (3), Iván, Álex Piñón e Juan Caínzos

 

 

 

 

 

 

 

 

Narón, 14 de outubro de 2023.- O Cidade de Narón sumou a segunda vitoria da temporada ante o Sport Sala Culleredo. Malia que o encontro careceu de ritmo tras recorrer o equipo visitante ao 5 para 4 xa no primeiro tempo, os xogadores naroneses axiña se fixeron co control do xogo e mandaron nun partido que acabaron gañando por 6-1 con goles de Pablo, que anotou tres, Iván, Álex Piñón e Juan Caínzos.

O Cidade chegaba a esta quinta xornada do calendario con ansias de vitoria logo dos resultados desiguais das anteriores. É porén, que especulou moito máis que en anteriores ocasións con alternancia de presión en media pista. O Culleredo, pola súa banda, saltou á cancha cun xogo moi directo que lle permitiu xerar máis de unha xogada de estratexia pero sen fortuna.

Pronto o Narón se foi facendo co partido aínda que lle faltou a fluidez da posesión do balón e a conexión co pivot de anteriores encontros. Pola contra gañou en efectividade e xa no minuto 2 subiu o primeiro tanto ao marcador da Gándara froito dunha xogada de estratexia que Iván finalizou cun gran gol.

O tanto serviu para que os naroneses gañasen en confianza e a penas dous minutos despois Juan Caínzos foi o encargado de bater a portería visitante. Aínda poido o Cidade ampliar a vantaxe do marcador grazas a varias xogadas de contrataque que os naroneses non lograron materializar. Pero así se chegou ao descanso: 2-0 no luminoso naronés e un Buxía que atallou todo canto chegou á meta local.

O segundo tempo comezou cun Cidade que seguiu a mesma tónica do primeiro tempo e pronto encarrilou o partido. No minuto 23 Pablo anotou o terceiro tanto e o Culleredo decidiu volver á estratexia de porteiro-xogador á que xa recorrera nos últimos minutos do primeiro tempo co fin de intentar parar o ritmo do partido e acercarse no marcador.

O equipo coruñés comezou a xerar algunha que outra ocasión de perigo pero Buxía seguiu firme repelendo os tiros visitantes e o Narón continuou ampliando a vantaxe. Pablo nos minutos 30 e 33 e Álex, no 34 completaron a táboa de goleadores. E malia que os últimos minutos de partido careceron de intensidade, serviron para que os visitantes anotasen o gol da honra por medio de Manu del Castillo.

O vindeiro fin de semana o Cidade de Narón viaxará a cidade herculina para enfrontarse ao 5 Coruña. Será o domingo 22, no Pavillón de Novo Mesoiro, a partir das 13 horas.

Ficha técnica:

Cidade de Narón: Buxía, Juan Caínzos, Iván, Guille e Diego Vázquez. Tamén xogaron Álex Piñón, Lucas, Diego Rey, Pablo Cotelo e Luis.

Sport Sala Culleredo: Jaime, Stefano, Óscar, Alvaro e Daniel. Tamén xogaron Ignacio, Fernando, Manuel, Lucas, Fernando González, Andrés e Manuel del Castillo.

Goles: (1-0) min. 3, Iván; (2-0) min. 4, Juan; (3-0) min. 23, Pablo; (4-0) min. 30, Pablo; (5-0) min. 33, Pablo; (6-0) min. 34, Álex Piñón.

Árbitros: Esteban Gómez e Yago Seijas (C.T.A. Galego).

Pavillón: PM A Gándara (Narón)

Dura derrota do Cidade de Narón ante o Rábade FS por 3-2

  • Varios desaxustes en defensa penalizaron aos xogadores de Abel Cernadas que malia dominar o encontro non acertaron nos metros finais

Narón, 7 de outubro de 2023.- O Cidade de Narón perdeu esta fin de semana o encontro que o enfrontou ante o Rábade FS, recentemente ascendido á Terceira División Nacional. Os de Abel Cernadas volveron a acusar varios descoidos en defensa que, ao final, resultaron decisivos. E é que malia dominar o xogo, os naroneses semellaron gafados nos metros finais e deixaron escapar tres puntos que, a priori, deberan ter viaxado cara Narón. Ao final, derrota por 3-2 con goles de Pablo e Guille e a baixa de Iván, que se lesionaba no minuto 37 e non podía rematar o encontro.

O primeiro tempo comezou cun claro dominio naronés ante un Rábade que agardou en media cancha a súa oportunidade pero que a penas inquietou a portería de Fer Combarro. O Cidade saía fácil de presión e xeraban abondosas ocasións. Ben conectando co pivot, ben con tiros afastados e mesmo de 2 contra 1. Pero hoxe non foi o día do Narón. Diego, Iván ou Guille marraron máis dunha ocasión clara de gol. E con empate a cero se chegou ao descanso no Eduardo Villamarín.

Na segunda parte os naroneses arrancaron con moitos descoidos en defensa que propiciaron os dous tantos locais nos minutos 22 e 24. Buscou o adestrador naronés a reacción no seu banco e comezou a mellorar o xogo do equipo amarelo e a dispor de novo de ocasións para acercarse no marcador. E así chegou o primeiro tanto do Cidade, obra de Pablo.

Pero nunha xogada desafortunada, os locais volvían a anotar. Un terceiro tanto que subía ao luminoso no minuto 30 e que obrigaba aos de Narón a ir a por todas con xogo de 5. Así comezou o asedio naronés sobre a portería local a través de balóns interiores. Ata que nunha xogada de estratexia Guille anotou o segundo gol do Narón.

Seguiu insistindo o Cidade pero sen fortuna e o encontro rematou con vitoria para os locais por 3-2 e coa lesión de Iván, que se mancaba na perna dereita a falta de apenas dous minutos para o remate do encontro e que é dúbida para a vindeira xornada.

Abel Cernadas lamentaba ao remate do partido que pese ao dominio do seu equipo “non soubemos aproveitar as abondosas ocasións das que dispuxemos e iso nestas canchas acaba pasando factura”.

O vindeiro fin de semana, o Cidade de Narón xogará na Gándara contra o Sport Sala.

Ficha técnica:

Rábade FS: Borja, Sergio, Jacobo, Xico e Alejandro. Tamén xogaron Adrián, David, Villegas, Jesús; Michael e Javier.

Cidade de Narón: Fer Combarro, Juan Caínzos, Iván, Guille e Diego Vázquez. Tamén xogaron Buxía, Álex Piñón, Lucas, Álex Naveira, Pablo Cotelo e Luis.

Goles: (1-0) min. 22, Sergio; (2-0) min. 24, Michael; (2-1) min. 24, Pablo; (3-1) min. 30, Jesús; (3-2) min. 35, Guille.

Árbitros: Carlos Jesús González e Héctor Pérez (C.T.A. Galego).

Pavillón: PM Eduardo Villamarín (Rábade)

O Cidade de Narón suma os tres primeiros puntos ante o Cidade das Burgas

  • Os naroneses bordaron un segundo tempo no que Juan Caínzos, Guille e Iván, con dous tantos, foron os goleadores da xornada

Narón, 30 de setembro de 2023.- O Cidade de Narón sumou este sábado os tres primeiros puntos da tempada tras impoñerse por 4-1 a un Cidade das Burgas que lle plantou cara aos naroneses e que mesmo se adiantou no marcador no minuto 15 do primeiro tempo. Sen embargo, a segunda parte pasoulle factura a nivel físico ao equipo que adestra Pablo Gómez, sufrindo ante un rival crecido que acabou coas súas aspiracións de vitoria por mor dos tantos de Juan Caínzos, Guille e Iván, en dúas ocasións.

O partido comezaba cun xogo moi parexo, no que aos de Narón lles duraba pouco o balón nos pés mentres que o Cidade das Burgas impoñía unha defensa intensa que lle permitía roubar o coiro e saír entre liñas da presión dos naroneses. Os de Abel Cernadas foron de menos a máis e dispuxeron de varias ocasións claras que nin Juan, nin Diego, nin Iván finalizaron con acerto.

Pero no minuto 18 chegou o primeiro tanto do partido, logo dunha moi boa contra na que Ron se plantou diante da meta defendida por Fer Combarro e anotou o 0-1 co que se chegou ao descanso.

No segundo tempo, os ourensáns mantiveron o tipo durante os primeiros minutos de partido, pero pouco a pouco o Narón se foi rearmando a través dun bo xogo colectivo en longo e unha maior posesión de balón. E no minuto 32 Iván abriu a lata co gol do empate.

A partir dese momento, chegou o dominio naronés con xogadas de estratexia e xogo con pivot que permitiu que no minuto 34 Guille anotase o segundo e dous minutos despois fixese o propio Juan Caínzos. A guinda a poñía Iván no minuto 37. Un cuarto tanto co que se pechou o marcador na Gándara.

Ao final, marcador de 4-1 para os locais. Un resultado que fai xustiza ao xogo despregado no segundo tempo polos de Narón e ao bo espectáculo que ambos equipos ofreceron aos aficionados que acudiron esta fin de semana á Gándara.

A vindeira semana, o Cidade de Narón viaxará ata a provincia lucense para xogar co Rábade FS.

Ficha técnica:

Cidade de Narón: Fer Combarro, Juan Caínzos, Iván, Guille e Diego Vázquez. Tamén xogaron Buxía, Álex Piñón, Lucas, Álex Naveira, Pablo Cotelo e Diego Rey.

Cidade das Burgas: Andrés, Ángel, Pablo, Ron e Neira. Tamén xogaron Fabián, Diego, Gonza, Guerra y Rodri.

Goles: (0-1) min. 18, Ron; (1-1) min. 32, Iván; (2-1) min. 34, Guille; (3-1) min. 36, Juan Caínzos; (4-1) min. 37, Iván.

Árbitros: Adrián García López e Sergio López Ramudo (C.T.A. Galego).

Pavillón: PM A Gándara (Narón)

O Cidade de Narón cae en Carballiño nun partido no que mereceu máis

  • Os naroneses estiveron a piques de remontar un encontro que perdían ao descanso por 4-1 e que chegaba condicionado polas baixas de Rober, Iván, Luis, Brais, Buxía e Rubén

  • Juan Caínzos, con tres tantos, e Lucas foron os encargados de anotar os goles do equipo que adestra Abel Cernadas

Narón, 23 de setembro de 2023.- O Cidade de Narón volveu de baleiro de Carballiño logo de perder por 5-4 no encontro correspondente á segunda xornada da Terceira División Nacional de fútbol sala. O equipo que adestra Abel Cernadas viaxou en cadro por mor das baixas de Rober e Brais por lesión e Iván, Luis, Buxía e Rubén, por motivos laborais. Malia a isto, o plantel que saltou á cancha do Paco Chao non perdeu a cara e logo dun primeiro mal tempo marcado polas imprecisións e os erros en defensa, foi quen de empatar e a piques estivo de traerse os tres puntos no peto. Ao final, 5-4 a favor dos locais con goles de Juan Caínzos, que anotaba tres tantos, e de Lucas.

O partido arrancou cun Carballiño que saltou á pista con moita intensidade e que cando aínda non se cumprira o primeiro minuto de xogo xa abrira o marcador a través dun tanto de Antonio. Os naroneses non se atoparon cómodos co xogo despregado polo equipo local e concederon varias contras e varias perdas de balón que permitiron aos de Luis Pampín ampliar as distancias e chegar ao descanso cun marcador de 4-1.

Pero o paso por vestiarios serviulles aos de Narón para saltar á pista moito máis centrados e agresivos co balón. E o que foi máis importante, moito máis acertados de cara á portería. Foi entón cando chegaron os tantos de Juan Caínzos e de Lucas, cos que os amarelos empataron o encontro.

Pero a intensidade no xogo despregado por uns e outros provocou que no minuto dez do segundo tempo, os dous equipos contasen con cinco faltas cadanseu polo que as defensas baixaron o ritmo e as oportunidades se sucederon para as dúas escuadras. E malia que tiveron a vitoria na man, os de Narón acusaron de novo a falta de acerto do primeiro tempo e marraron as abondosas ocasións coas que contaron para sumar os tres puntos.

Ao final, 5-4 no Paco Chao a favor dos locais, cun Carballiño que aguantou a arrancada do Cidade no segundo tempo, no que os amarelos foron máis intensos e efectivos aínda que non o suficiente como para gañar .

A vindeira fin de semana, o Cidade de Narón xogará na casa ante o Cidade das Burgas. Un encontro que terá lugar na xornada do sábado 30, a partir das 19 horas.

Ficha técnica:

Carballiño FS: Eric, Édgar, Hugo, Mathias e Antonio. Tamén xogaron David, Iago, Óscar, Noel e Xacobo.

Cidade de Narón: Fer Combarro, Juan Caínzos, Pablo, Guille e Diego Vázquez. Tamén xogaron Álex Piñón, Lucas, Álex Naveira e Diego Rey.

Goles: (1-0) min. 1, Antonio; (2-0) min. 11, Xacobo; (3-0) min. 16, Óscar; (3-1) min. 18, Juan Caínzos; (4-1) min. 19, Edgar; (4-2) min. 23, Juan Caínzos; (4-3) min. 26, Lucas; (4-4) min. 35, Juan Caínzos; (5-2) min. 36, David.

Árbitros: Tania María Penabad e Roberto Pérez (C.T.A. Galego).

Pavillón: PM Paco Chao (O Carballiño)