Noticias

O Cidade acada un valioso empate a domicilio ante o Pazos de Borbén

  • O tanto anotado por Lucas no minuto 27 serviu para que os naroneses igualaran un partido moi disputado e intenso, que se poido decantar para calquera dos dous equipos

Narón, 2 de marzo de 2025.- O Cidade de Narón acadou un valioso empate no encontro celebrado esta fin de semana fronte a Pazos de Borbén. Un partido moi disputado por parte dos dous equipos que ben se poido decantar para calquera deles, xa que ambos dispuxeron de boas ocasión para anotar na portería rival. O choque finalizou con igualdade no marcador gracias ao tanto anotado mediado o segundo tempo por Lucas, que poñía o 1-1 no marcador.

O encontro tivo dúas fases diferenciadas. O primeiro tempo empezou cun roubo de balón de Luís que a piques estivo de se converter no primeiro tanto para os naroneses. Unha xogada que foi desbaratada antes de que o balón cruzara a liña, pero que serviu para que o Cidade fose collendo confianza.

Entre mentres, o Pazos creaba perigo na portería de Buxía mediante accións de estratexia tanto de banda como de saque de esquina con tiros exteriores. De feito, os locais puideron poñerse por diante logo dunha acción na que o balón rebotou no pao logo dun tiro exterior e un xogador local acabou de novo enviando ao traveseiro.

Pero malia que o Pazos redobrou esforzos para anotar o primeiro do partido, o Narón traballou moi ben as coberturas defensivas e foi subindo liñas. Tal foi así que nos últimos compases do primeiro tempo, o Cidade púxolle moi difícil a saída de balón en presión ao Pazos e a piques estivo de adiantarse no marcador.

O segundo tempo arrancou cun Pazos que adiantou liñas, subiu a presión e dificultou a saída de balón do Narón que o intentou á contra. Pero esa maior intensidade do xogo do equipo local propiciou que no minuto 22, Martín adiantase ao seu equipo logo dun erro dos naroneses no medio do campo.

A presión alta dos locais volveu dar os seu froitos pouco despois, cun tiro ao pao de Jacobo pero pouco a pouco o Narón foi subindo liñas, foi apertando e logo dun saque en longo de Buxía que non chapou o porteiro local, Lucas enviou ao fondo das mallas.

O Cidade comezou a sentirse cómodo na cancha e mediado o segundo tempo colleu algo máis de ritmo co balón. Ese bo momento de xogo do equipo naronés a piques estivo de supoñer o seu segundo gol grazas a unha grandísima xogada persoal de Migui que non foi quen de finalizar.

Na recta final do encontro, o Cidade se atopou cun equipo local que baixou un pouco o pistón ao acumular cinco faltas pero que non renunciaba a levarse os tres puntos, o que obrigou aos de Javi Albes a intensificar o bo traballo defensivo que realizaron ao longo dos 40 minutos de partido.

O choque rematou con empate a 1 no municipal de Pazos de Borbén, nun partido no que ambos equipos apostaron por sumar e non asumir máis riscos dos necesarios.

Ficha técnica:

Pazos de Borbén: Xairo, Luis, Aarón, Jacobo e Martín. Simón, Jonathan, Diego, Alfredo, Manuel e Pablo.

Cidade de Narón: Buxi, Guille, Lucas, Diego e Héctor. Tamén xogaron Luis, Paulo, Lautaro, Pablo, Javi e Migui.

Goles: (1-0) min. 22, Martín; (1-1) min. 27, Lucas.

Árbitros: Carlos Jesús González e Rafael Alberto Tovar (C.T.A. Galego).

Pavillón: Pavillón Municipal Pazos de Borbén (Pazos de Borbén)

 

O Cidade suma tres puntos na Gándara tras vencer ao Friol por 4-3

  • Os naroneses acadan a oitava vitoria na casa, que esta tempada se está a converter nun auténtico fortín para os de Javi Albes, con goles de Iván, Lautaro, Migui e un en propia porta do xogador visitante Adrián

Narón, 22 de febreiro de 2025.- O Cidade de Narón sumou tres novos puntos no partido que o enfrontou esta fin de semana na Gándara ante o Concello de Friol. Un encontro moi disputado entre dous equipos que pelexan na zona media da táboa e no que o Cidade estaba obrigado a gañar para manter as opcións de poder disputar o playoff polo ascenso. O marcador final decantouse cara os naroneses por 4-3, logo dos goles anotados por Iván, Lautaro, Migui e o tanto en propia porta do xogador visitante Adrián.

 

O partido empezou cun Cidade cunha presión moi alta e un Friol que amosou as súas cartas con xogadas á contra e un xogo ben desenvolto en facetas ofensivas e xerando perigo con situacións de superioridade.

Os de Narón tentárono neses primeiros minutos de xogo a través de Guille, que estrelou un balón ao pao, e de Iván, que mandou un tiro á escuadra. Pero foi o Friol o que estreou o marcador da Gándara tras roubar en media cancha e finalizar á perfección.

Corría o minuto 5 e lonxe de baixar os brazos, os de Javi Albes mantiveron a intensidade tanto en tarefas defensivas como ofensivas e no minuto 12 Iván anotou o primeiro tanto local logo dun saque de banda lateral e unha boa condución.

A partir dese momento, o equipo local colleu confianza e nun bo balón en zona de finalización que filtrou Héctor, Lautaro golpeou de primeiras e puxo por diante ao Cidade de Narón.

O encontro seguiu cun ritmo moi alto e cun Friol que lonxe de descompoñerse seguiu xerando perigo na meta de Buxía. E a piques de rematar o primeiro tempo, o xogador lucense Manuel conseguiu poñer o balón na escuadra. Con empate a dous tanto chegou o descanso á Gándara.

O segundo tempo seguiu de xeito moi similar, cun Narón cunha defensa moi alta e un Friol que seguiu loitando por levarse os tres puntos. E nunha acción individual de Lautaro con condución en banda que finalizou cun bo tiro a portería, o xogador visitante Adrián, nun intento por desviar a traxectoria do balón, acabou enviándoo ao fondo da súa porta. Un gol que subiu ao luminoso naronés e que volveu a poñer por diante ao Cidade.

A partir dese momento, o partido entrou nunha fase na que os locais non conseguiron ter unha posesión continua en ataque e un Friol que se envorcou na portería de Buxía e que xerou abondosas ocasións de perigo.

O partido resolveuse nos últimos minutos, logo de que os visitantes decidiron arriscar sacando porteiro-xogador e anotaron un tanto a falta de dous minutos para o asubío final que puxo o empate a 3 no marcador.

E foi entón cando o Cidade decidiu recorrer ao 5 para 4 e na segunda ocasión de ataque, Diego anotou o gol da vitoria.

O Cidade sumou deste xeito a súa oitava vitoria na casa e se mantén nos postos altos da táboa e con todas as opcións para loitar pola fase de ascenso.

Ficha técnica:

Cidade de Narón: Buxi, Guille, Lucas, Diego e Migui. Tamén xogaron Iván, Paulo, Héctor, Lautaro, Pablo e Javi.

Concello de Friol FS: Gonzalo, Manuel, Adrián, Diego Reigosa e Diego Vidal. Tamén xogaron David Villar, Angel, David Arias e Guillermo.

Goles: (0-1) min. 5, Manuel; (1-1) min. 12, Iván; (2-1) min. 15, Lautaro; (2-2) min. 20, Manuel; (3-2) min. 22, Adrián (PP); (3-3) min. 38, Diego Vidal; (4-3) min.39, Diego.

Árbitros: Eloy Bello e Franco Alvaro Campagnoli (C.T.A. Galego).

Pavillón: Pavillón Municipal A Gándara (Narón)

 

 

O Cidade calla de novo un bo encontro na Gándara e vence ao Korreo Guitiriz

  • O marcador arroxou un resultado final de 7-4 con tantos de Migui (2), Iván (2), Guille, Paulo e Lucas

Narón, 8 de febreiro de 2025.- O Cidade de Narón sumou unha nova vitoria na Gándara ante o equipo lucense O Korreo Guitiriz. O encontro, correspondente á vixésimo primeira xornada da Terceira División Nacional, rematou cun contundente 7-4 grazas ao bo acerto dos naroneses en ataque, que acosaron a portería visitante ao longo dos 40 minutos de xogo.

O partido arrancou cun Cidade con moita intensidade que axiña deixou xogadas con moito perigo ante a porta ben defendida por Martín. Tanto foi así que no minuto catro, Guille anotou o primeiro tanto local logo dun bo tiro cruzado.

O primeiro tanto naronés en subir ao marcador deu máis confianza aos xogadores de Javi Albes, que continuaron asediando a portería visitante ata que nunha gran xogada colectiva e tras un rexeite, Migui aproveitou para coller o balón dentro do área e enviar a bola ao fondo da rede, poñendo o 2-0.

Aínda dispuxeron de mais oportunidades os de Narón para abrir brecha, ata que no minuto 15 Iván anotou o 3-0, o que obrigou ao Korreo a subir liñas e abrir o partido para intentar meterse nel. E nesas chegou o primeiro gol dos de Guitiriz, que tras unha perda de balón do Cidade foi aproveitada por Asier para anotar.

Con 3-1 o equipo visitante se veu arriba e a piques estivo de reducir a vantaxe senón for por unha excelente intervención de Iker no bordo da área, que desbaratou o un contra un dos visitantes e mantivo a distancia de dous tantos a favor dos locais.

No segundo tempo o Cidade arrancou con moita intensidade pero cedendo campo a Korreo Guitiriz, que empezou a xerar perigo na porta defendida, nesta ocasión por Buxía, con varias ocasións claras que os naroneses conseguiron frear. Pero nunha boa xogada de banda entre Pablo e Migui, chegou o cuarto gol do Cidade.

O encontro se puxo de cara para os de Narón pero nun arreón dos xogadores lucenses, estes aproveitaron un rexeite para anotar o segundo tanto e acurtar distancias.

Sen embargo, o Cidade de Narón non perdeu intensidade e unha gran acción individual de Lucas que saíu con balón desde cancha propia serviu para que este se apuntase o quinto gol local.

O Korreo seguiuno intentando e un novo roubo de pelota permitiu aos de Guitiriz acurtar de novo as distancias cun gran tiro exterior. Pero o Cidade non baixou os brazos e foi Paulo o que anotou o sexto logo dun tiro esquinado.

Malia que Korreo tentou meterse de novo no encontro cun novo tanto, foi Iván que, logo dun rexeite, anotou o sétimo e definitivo gol dos naroneses.

Ficha técnica:

Cidade de Narón: Iker, Diego, Guille, Luis e Miguel. Tamén xogaron Buxía, Iván, Lucas, Paulo, Héctor, Lautaro e Pablo.

O Korreo Guitiriz: Martín, Alberto, Esteban, Diego e Daniel. Tamén xogaron Diego Fernández, Diego Carreira, Asier, Antón, David e Jacobo.

Goles: (1-0) min. 4, Guille; (2-0) min. 14, Migui; (3-0) min. 15, Iván; (3-1) min. 16, Asier; (4-1) min. 21, Miguel; (4-2) min. 24, Asier; (5-2) min.24, Lucas; (5-3) min 26, Diego Fernández; (6-3) min. 27, Paulo; (6-4) min.30, Diego; (7-4) min. 39, Iván.

Árbitros: Sergio Blanco e Héctor Pérez (C.T.A. Galego).

Pavillón: Pavillón Municipal A Gándara (Narón)

 

 

 

O Cidade fai da Gándara o seu fortín e suma unha nova vitoria ante o Marín FS

  • Os naroneses venceron por 6-3 logo de dominar o encontro e ter máis pegada que o equipo visitante

  • Os tantos foron obra de Diego (2), Luis, Iván, Migui e Javi

Narón, 25 de xaneiro de 2025.- O Cidade de Narón volveu a colleitar unha nova vitoria na casa e xa van tres seguidas. Os de Javi Albes se impuxeron por 6-3 ao Marín Futsal, nun encontro que dominaron desde o primeiro momento e no que o acerto dos xogadores locais de cara a porta permitiulles gañar con solvencia. Os tantos dos naroneses foron obra de Diego(2), Luis, Migui, Iván e Javi.

Os de Narón arrancaron o encontro con moita intensidade, afogando a saída do Marín da súa cancha e desfrutando de maior posesión de balón ante un Marín incapaz de atacar a defensa alta do Cidade.

As boas combinacións dos xogadores naroneses en ataque, con bastante velocidade na execución das accións e bo xogo combinativo, puxeron en perigo constante a portería do Marín. De feito, dúas boas accións do porteiro mariñense Ángel impediron que o primeiro gol local subise antes ao marcador, xa que Lucas e Diego dispuxeron de dúas boas oportunidades para perforar a meta visitante.

Pero a persistencia dos xogadores locais, que acosaron unha e outra vez a área visitante, deu o seu froito no minuto 6, cando Diego anotou o primeiro tanto local logo dunha boa xogada de equipo.

O Narón quería máis e mantivo a súa defensa moi alta sen que os xogadores do Marín atopasen o xeito de saír do seu campo. E cando aínda non se cumprira un minuto do gol anotado por Diego, chegou o segundo do Narón grazas a unha boa presión de Luis en primeira liña que acabou roubando o balón e enviándoo ao fondo das mallas.

As rotacións dos naroneses non minguaron o nivel de xogo pero o exceso de confianza en ataque provocou algún que outro erro nas coberturas defensivas e permitiu ao Marín entrar en xogo con varias contras que chegaron ata a meta defendida polo porteiro xuvenil Iker. E nun deses ataques e tras varios rexeites, chegou o primeiro gol visitante, obra de David.

O 2-1 deu alas a un Marín que aproveitou as malas finalizacións do Cidade para montar contras que en dúas ocasións Iker logrou salvar para manter ao Cidade no partido e rematar o primeiro tempo cunha vantaxe pola mínima.

O segundo tempo arrancou de xeito moi parecido a como arrancou o choque: o Cidade seguiu con presión alta, mentres que o Marín saíu moito máis enchufado e levou moito máis perigo á meta defendida neste segundo período por Buxía. De feito, os de Marín nunha contra ben levada e logo de varios rexeites conseguiron igualar o marcador por medio de Aitor.

Pero o Cidade non perdeu o calma e, tirando de experiencia, Miguel anotou o terceiro tanto local tras unha xogada de estratexia.

Con 3-2 no luminoso do municipal naronés, o pupilos de Javi Albes baixaron a defensa a media pista dificultando moito o xogo colectivo de Marín que careceu de profundidade e non creou a penas perigo algún. Unha circunstancia que foi aproveitada polo equipo local para, nunha xogada de estratexia ben ganduxada por todo o equipo, Iván puxera o 4-2 no marcador.

A partir de aquí o Marín subiu liñas e o Cidade mantivo unha defensa en media pista moi cómoda sen que a penas xerase perigo algún. Tentouno tamén con 5 para 4 o equipo pontevedrés pero foi Javi tras un roubo de balón o que ampliou a distancia cunha gran vaselina.

O Marín non baixou os brazos e mantivo a estratexia de porteiro xogador coa que conseguiu acurtar distancia ao anotar David o terceiro tanto para po seu equipo a falta de un minuto para o final. E cando o partido semellaba sentenciado, Diego anotou de cabeza grazas a un pase en longo de Buxía o sexto e definitivo tanto dos de Narón. Vitoria final por 6-3 para o Cidade que amosa unha melloría na segunda volta e un bo xogo de pivot que fai que o equipo renda a bo nivel.

A vindeira fin de semana o Cidade de Narón viaxará a Ourense para enfrontarse ao Carballiño FS.

Ficha técnica:

Cidade de Narón: Iker, Lucas, Héctor, Diego e Miguel. Tamén xogaron Buxía, Iván, Luis, Guille e Javi.

Marín Futsal: Ángel, Diego, Samuel, Solla e Aitor. Tamén xogaron David, José Ángel, Badre, Fernando, César e Roberto.

Goles: (1-0) min. 6, Diego; (2-0) min. 6, Luis; (2-1) min. 8, David; (2-2) min. 23, Aitor; (3-2) min. 26, Miguel; (4-2) min. 31, Iván; (5-2) min.38, Javi; (5-3) min. 40, David; (6-3) min. 40, Diego.

Árbitros: Gabriel Balea e Yago Seijas (C.T.A. Galego).

Pavillón: Pavillón Municipal A Gándara (Narón)

 

 

Reparto de puntos entre o Cidade de Narón e o Sport Sala en Culleredo

  • Os dous equipos dispuxeron de moitas e moi boas ocasións para poñer distancia no marcador pero as boas accións dos dous porteiros impediron pasar do empate a un tanto

Narón, 18 de xaneiro de 2025.- O Cidade de Narón arrancou un meritorio punto no encontro que o enfrontou esta fin de semana ao segundo clasificado do Grupo 8 da Terceira División do Fútbol Sala Nacional, o Sport Sala Culleredo. O pavillón de Tarrío acolleu un partido no que os naroneses renderon a un bo nivel tanto en defensa como en ataque e no que o empate soubo a pouco logo das abondosas ocasións das que dispuxeron os xogadores que adestra Javi Albes pero que, ao final, semellou ser o resultado máis xusto xa que o estado esvaradío da pista, dificultou, e moito, os controis de balón e as boas xogadas.

O choque comezou con moita intensidade por parte dos dous equipos, cun Culleredo que mantivo unha defensa moi alta durante os 40 minutos de xogo, e un Narón que alternou a defensa en media cancha coa presión. De feito, a estratexia dos naroneses deixou un arranque de partido con varias accións coas que a punto estiveron de abrir o marcador. A primeira delas saíu das botas de Guille, nun man a man co porteiro local. Logo chegaría a de Lucas que arrancou desde o seu campo e nunha moi boa acción, se plantou ao borde da área local e golpeou un balón que pasou moi preto do pao.

Co paso dos minutos, os naroneses deixaron coller a iniciativa ao Culleredo pero o modo de xogar do equipo da casa, con ataques moi directos, deixou posesións moi curtas e pouco perigo ante a meta que defendeu Buxía, que a penas tivo que desbaratar un par de ocasións dos locais.

O Cidade continuou con rotacións continuas e con novas oportunidades para inaugurar o luminoso de Tarrío, nesta ocasión a través de Migui e de Javi. Pero precisamente cando os de Narón dispuxeron de maior posesión de balón e moita profundidade no xogo, chegou o tanto local grazas a unha boa contra que rematou Daniel cun tiro cruzado que Buxía foi incapaz de chapar, poñendo o 1-0.

Os naroneses seguiron intentando saír da presión dos locais con balóns en longo de Buxi e nunha desas Diego, nunha saída de presión de balón, se plantou ante a portería do Culleredo e meteu un balón ao segundo pao que acabou no fondo das mallas malia o intento de Fernando por despexalo con pouco tino. O partido chegou ao final do primeiro tempo con empate e sen apenas faltas.

No segundo tempo o Culleredo botouse arriba para asediar a portería de Buxía, xogando máis co pivot e con 1 para 1 en banda. Esta estratexia non impediu que os naroneses volveran a desfrutar de varias ocasións para poñerse por diante no marcador, tanto por medio de Guille, que tivo outro man a man co porteiro, como de Héctor e Diego que se plantaron diante do porteiro sen acerto.

E pese a que os da casa o tentaron na recta final con balóns ao segundo pao que deron certa sensación de perigosidade, Buxía desbaratounas unha e outra vez.

Con empate a un tanto, os dous equipos decidiron non arriscar e renunciaron a porteiro-xogador, polo que o partido rematou cun reparto xusto de puntos.

O vindeiro sábado, o pavillón da Gándara acollerá o choque entre o Cidade de Narón e o Marín Futsal.

Ficha técnica:

Sport Sala Culleredo: Jaime, Fernando, Andrés, Víctor e Daniel. Tamén xogaron Óscar, Brais e Manuel.

Cidade de Narón: Buxi, Diego, Javi, Guille e Miguel. Tamén xogaron Luis, Lucas, Iván, Héctor e Pablo.

Goles: (1-0) min. 15, Daniel; (1-1) min. 19, Fernando (PP).

Árbitros: Adán Cabo González e Borja Rodríguez Rodiño (C.T.A. Galego).

Pavillón: Pavillón Municipal da Gándara (Narón).

 

O Cidade comeza a segunda volta cunha vitoria clara sobre o ED Vigo 2015 na Gándara

  • Os de Narón levaron as rendas dun encontro no que deixaron moi boas sensacións tanto en defensa como en ataque e que gañaron por 4-1 con goles de Diego, Lucas, Luis e Iván

Narón, 11 de xaneiro de 2025.- O Cidade de Narón arrancou a segunda volta de Terceira División Nacional de Fútbol Sala cunha vitoria clara ante o ED Vigo 2015 e deixando moi boas sensacións na cancha. Os naroneses, que se enfrontaron a un dos máximos goleadores da categoría e cun importante caudal ofensivo, contaron coa intensidade necesaria para competir a un ritmo altísimo os 40 minutos de xogo, cunha defensa ordenada e xerando bastantes ocasións en ataque. O encontro rematou cun marcador de 4-1 con goles de Diego, Lucas, Luis e Iván.

O partido comezou con dous equipos ben plantados na pista e cun ritmo alto de xogo, con defensa en media cancha que pouco a pouco se foi convertendo en presión. Mentres que o Cidade de Narón arrancou con moito acerto nas súas situacións ofensivas, xerando moito xogo e fallando poucos pases; o ED Vigo intentou superar a defensa en media cancha dos naroneses con pouco acerto e moitas dúbidas no seu xogo.

 

Axiña o equipo local se puxo por diante no marcador grazas a un balón filtrado de Guille no borde da área que foi aproveitado por Diego para, cunha enorme definición, poñer o balón na escuadra da portería.

O partido transcorreu cun Cidade que dispuxo de abondosas ocasións que non materializou e cun equipo visitante que o intentou con xogo de pivot pero con pouco acerto. Ata que se chegou ao descanso.

O segundo tempo comezou cun Cidade que xa nos primeiros instantes dispuxo novamente de varias boas ocasións tanto con xogadas de estratexia como collendo as costas dos xogadores vigueses. Unha circunstancia que levou aos visitantes a renunciar ao xogo de pivot e iniciar os ataques de catro con pouca profundidade e xerando pouco perigo no marco de Buxía.

O encontro seguiu dominado polos naroneses ata que tras unha boa xogada por banda de Lucas, este puxo o balón ao segundo pao para que Luis o enviara ao fondo das mallas. Un tanto que deu tranquilidade aos xogadores do Cidade para afrontar a recta final dun encontro na que os vigueses apostaron polo xogo de cinco. E foi nesas cando Lucas aproveitou un roubo de balón para anotar o terceiro tanto local.

A piques de rematar o choque, un mal despexe de Diego provocou o gol en propia porta de Lucas que puxo o 3-1 no luminoso da Gándara. Pero aínda quedou tempo para anotar o cuarto e definitivo grazas ao roubo de Migui que, tras unha parede con Iván, deixou o balón para que o 9 naronés anotase o 4-1 definitivo.

A vindeira semana os naroneses viaxarán hasta Culleredo para enfrontarse ao Sport Sala.

Ficha técnica:

Cidade de Narón: Buxi, Diego, Héctor, Lucas e Miguel. Tamén xogaron Luis, Guille, Iván, Javi e Pablo.

ED Vigo 2015: Joel, Miguel, Javi, Lucas e Manuel. Tamén xogaron Carlos, Alberto, Óscar, Jorge, Samuel, Tomás e Anxo.

Goles: (1-0) min. 1, Diego; (2-0) min. 22, Luis; (3-0) min. 38, Lucas; (3-1) min. 39, Lucas (PP); (4-1) min. 39, Iván.

Árbitros: Juan Ramón Juan Mora e Nicolás Villegas Sordo (C.T.A. Galego).

Pavillón: Pavillón Municipal da Gándara (Narón).

O Cidade remata o ano con vitoria na casa ante o Praias de Barreiros

  • Logo dun mal primeiro tempo cheo de imprecisións, os naroneses recuperaron o xogo colectivo para apontoar un triunfo con tantos de Guille (3), Migui e Lucas.

Narón, 21 de decembro de 2024.- O Cidade de Narón disputou esta fin de semana o ultimo partido da primeira volta e tamén do ano ante o Praias de Barreiros CD. Un encontro que comezou de costas para os pupilos de Javi Albes, faltos de ideas e con demasiadas precipitacións, pero que souberon repoñerse no segundo tempo e anotar en 10 minutos os 4 tantos que lles deron a vitoria. Os goles do choque foron obra de Guille (3), Migui e Lucas.

O partido arrancou cun Praias de Barreiros moi enchufado, que traballou con moito acerto todas as facianas do xogo mentres que o Cidade non tivo a profundidade desexada en ataque e lle custou ganduxar boas xogadas, grazas tamén á presión dos visitantes en primeira liña. De feito, o partido transcorreu sen moitas concesións por parte dos dous equipos e tentando non cometer erros ata que logo dunha xogada de estratexia do Cidade, o Praias roubou o balón para poñerse por diante no marcador a través do tanto anotado por Semedo.

Os de Narón continuaron sen coller ritmo de partido malia que coa entrada de Iván, os locais gañaron algo de profundidade no xogo. Mesmo chegaron a estrelar dous balóns ao pao, pero os goles non chegaron. E nunha desas, o equipo da Mariña aproveitou de novo as imprecisións dos naroneses e anotou o segundo. Un contratempo que obrigou ao adestrador local a pedir un tempo morto e a buscar alternativas ao xogo despregado polo seu equipo ata ese momento. E cando semellaba que o primeiro tempo ía rematar co 0-2 a favor dos visitantes, chegou o tanto naronés por medio dun disparo lateral de Guille.

O segundo tempo cambiou totalmente o guión do encontro, cun Cidade que buscou a vitoria e para iso aplicou unha maior intensidade ofensiva tanto nos desprazamentos como no xogo co pivot, pechando ao Praias de Barreiros no seu campo. E así foron pasando os minutos, cun Narón volcado en ataque, ata que no minuto 30 Lucas anotou o tanto do empate mediante un gran disparo lateral que puxo na escuadra da portería visitante.

Un gol ao que lle seguiron o de Migui, que chegou tras unha boa xogada colectiva, e os dous de Guille. Catro tantos en dez minutos que serviron para que o Cidade lle dera a volta ao marcador e se anotase unha vitoria que lle permite chegar ao parón de Nadal nos postos medio-altos da táboa clasificatoria e que agarda mellorar os seus díxitos para a segunda volta.

A competición se retomará o sábado 11 de xaneiro no pavillón da Gándara ante o ED Vigo 2015.

Ficha técnica:

Cidade de Narón: Iker, Diego, Héctor, Javi e Guille. Tamén xogaron Buxía, Migui, Pablo, Lucas, Iván e Manu.

Praias de Barreiros CD: Roi, Aarón, Antonio, Semedo e Bruno. Tamén xogaron Anxo, Fabián, Jairo e Santi.

Goles: (0-1) min. 9, Semedo; (0-2) min. 16, Santi; (2-1) min. 19, Guille; (2-2) min. 30, Lucas; (3-2) min. 35, Migui; (4-2) min. 36, Guille; (5-2) min 37, Guille.

Árbitros: Sergio López e Rafael Alberto Tovar (C.T.A. Galego).

Pavillón: Pavillón Municipal da Gándara (Narón).

O Cidade de Narón non pasa do empate na súa visita a Rábade

  • As xogadas de estratexia definiron un encontro no que os naroneses souberon sobrepoñerse ao ímpetu inicial dos locais

  • Os tantos dos amarelos foron obra de Javi, Guille, Miguel e Luis

Narón, 14 de decembro de 2024.- O Cidade de Narón volveu cun punto no peto do partido que o enfrontou esta xornada ao IM Galical Rábade FS. Un choque con moitas alternativas e onde primaron as xogadas de estratexia para avanzar no marcador. Con empate a 4, os tantos dos naroneses foron obra de Javi, Guille, Miguel e Luis.

O encontro comezou con dúas estratexias diferentes. Mentres os locais arrancaron o partido cunha defensa moi alta e con moito xogo de pivot, o Cidade facíao con defensa en media cancha, con maior posesión de balón e con ataques máis traballados.

O tirón inicial do Rábade obrigou ao Narón a afinar a defensa para facer fronte ao xogo de estratexia dos locais, que xa no minuto 1 de partido lles permitiu anotar o primeiro tanto do partido. Un revés que lonxe de desanimar aos naroneses, levounos a intensificar o traballo tanto en defensa como en ataque e a dispoñer das primeiras ocasións claras de gol á contra que non foron aproveitadas.

O Rábade non mudou a estratexia de partido ata que mediado o primeiro tempo decidiu subir máis a presión de balón e noutra xogada de estratexia anotou o segundo gol, o que obrigou ao adestrador naronés a pedir un tempo morto e reorganizar o partido. E vaia se o fixo, xa que a penas dos minutos máis tarde, nunha boa xogada de pivot , Javi estableceu o 2-1 no marcador.

Cando semellaba que o Cidade ía a máis logo de dúas boas accións de Javi e Guille que a piques estiveron de acabar no fondo das mallas, o Rábade volveu fiar a súa sorte ao xogo de estratexia e anotou o terceiro tanto tras un saque de esquina. Un gol que volveu a abrir brecha no luminoso do Eduardo Villamarín e co que se chegou ao descanso.

No segundo tempo o Cidade saíu a polo partido, subindo liñas e apertando máis a Rábade, ao que lle custou combinar con xogo de pivot e acusou a falta de posesión de balón. E os naroneses con moita máis mobilidade comezaron a acosar a portería local. E nesas chegou o tanto de Guille, que logo dunha estratexia de xogada de córner puxo o 3-2 e meteu a Cidade no partido.

Os de Narón desfrutaron dos mellores minutos de xogo e no 31 chegou o empate obra de Miguel, logo dun gran saque de banda. E a penas uns segundos despois, nunha boa conexión con Luis se puxo por diante a Cidade.

A partir de aquí, os amarelos repregaron liñas e baixaron a media pista mentres que o Rábade seguiu intentándoo con xogadas de estratexia e 1 para 1 en banda pero sen bater a Buxi. Ata que unha perda de balón a falta de cinco minutos para o final, deixou aos de Albes sen balance defensivo e cun xogador menos tras a expulsión de Luis. A situación de superioridade aproveitouna o equipo local que, cun gran tiro exterior, empatou o encontro. E pese a que o intentouno a través das accións de Lucas e de Javi, o encontro rematou con táboas no marcador.

A vindeira fin de semana, o Cidade de Narón pechará o ano xogando na casa ante o Praias de Barreiro. Un partido que dará comezo ás seis do serán.

Ficha técnica:

Galical Rábade FS: Borja, Alejandro, Pablo, David e Xico. Tamén xogaron Iago, David Arias, Rodrigo, Borja Corral e Alejandro Gruñeiro.

Cidade de Narón: Buxi, Lucas, Guille, Diego e Héctor. Tamén xogaron Migui, Pablo, Luis e Javi.

Goles: (1-0) min. 1, Xico; (2-0) min. 15, David; (2-1) min. 17, Javi; (3-1) min. 18, David; (3-2) min. 24, Guille; (3-3) min. 31, Migui; (3-4) min 31, Luis; (4-4) min. 33, Borja Corral.

Árbitros: Sergio Blanco e Héctor Pérez Álvarez (C.T.A. Galego).

Pavillón: Pavillón Municipal Eduardo Villamarín (Rábade)

Un Cidade intermitente salva un punto ante o Stellae Leis B na Gándara

  • Os naroneses alcanzaron unha cómoda vantaxe grazas aos tantos de Lucas (2) e Guille, unha superioridade que perderon no ecuador do segundo tempo para acabar con reparto de puntos

Narón, 7 de decembro de 2024.- O Cidade de Narón non callou un bo encontro no choque que o enfrontou na Gándara ante o Stellae Leis Pontevedra B. Os xogadores naroneses acusaron un xogo intermitente que os levou a alcanzar unha cómoda diferencia de dous goles nada máis iniciar o segundo tempo para acabar encaixando un empate que soubo a pouco. Os tantos dos naroneses foron obra de Lucas (2) e Guille.

O encontro arrancou cun Cidade de Narón incapaz de superara a presión do Stellae Leis para poder conectar co pivot. Os naroneses o intentaron con rotacións continuas pero non se atoparon cómodos en ningún momento, mentres que os visitantes se anticiparon ben ao xogo local e montaron contras perigosas.

Sen facer un bo primeiro tempo, o Cidade conseguiu poñerse por diante no marcador grazas ao tanto anotado por Lucas no minuto 18. Pero os naroneses seguiron sen imprimirlle ritmo ao partido e sen xerar ocasións de gol. E con vitoria pola mínima chegou o descanso.

A segunda parte volveu arrancar con pouca intensidade e logo de varias boas combinacións, o Leis conseguiu plantarse ante a meta defendida por Buxí e nun pase ao segundo pao, Diego anotou en propia porta.

Con empate a 1 tanto na Gándara, os naroneses subiron intensidade e chegaron os mellores minutos dos xogadores que adestra Javi Albes. E tamén os tantos: de Guille ao segundo pao no minuto 23, e de Lucas en xogada de estratexia no minuto 26.

Pero unha vez máis, os naroneses volveron a baixar o ritmo de xogo e acabaron encaixando dous tantos que puxeron a igualdade no marcador. Un empate co que se chegou ao final do partido.

Ficha técnica:

Cidade de Narón: Iker, Diego, Lucas, Migui e Héctor. Tamén xogaron Buxía, Luis, Iván, Javi, Pablo e Guille.

Leis Pontevedra B: Borja, José A, Hugo, Adrián e Martiño. Tamén xogaron Diego Jamardo, Diego Alonso, Joel e Samuel.

Goles: (1-0) min. 11, Lucas; (1-1) min. 21, Diego(PP); (2-1) min. 23, Guille; (3-1) min. 26, Lucas; (3-1) min. 28, Diego Alonso; (3-3) min. 30, Martiño.

Árbitros: Martín Díaz e Sergio López (C.T.A. Galego).

Pavillón: Pavillón Municipal da Gándara (Narón)

O Cidade de Narón suma a terceira vitoria consecutiva ante o ADFS Bueu

  • Os naroneses, malia as baixas de Buxía e Fer Combarro na porta, e dos xogadores Javi, Guille, Luis e Paulo, formularon un partido moi práctico que gañaron po 3-1 grazas aos tantos de Pablo e Lucas (2)

Narón, 1 de decembro de 2024.- O Cidade de Narón sumou esta fin de semana a súa terceira vitoria consecutiva ante o ADFS Bueu grazas aos tantos anotados por Pablo e Lucas (2) e malia as numerosas baixas que presentaron os locais para este encontro: Fer Combarro e Buxía na portería e os xogadores Javi, Guille, Luis e Paulo. Os naroneses formularon un partido moi práctico ante un equipo visitante que aterrou na Gándara cun sistema de xogo definido e coas ideas claras, pero que se atopou cun Iker, porteiro do equipo xuvenil, moi seguro baixo os paos.

O Cidade arrancou o choque cun sistema diferente ao que emprega habitualmente en casa, con defensa en media cancha. E se atopou cun Bueu que quixo ter a posesión do balón, con pouca profundidade no ataque, pero intentando xerar perigo con accións ás costas dos xogadores da defensa naronesa.

Os locais controlaron o partido pero amosaron menos intensidade no xogo que en ocasións anteriores, e aínda que o Bueu pareceu algo máis acertado neste primeiro tempo, foron os naroneses os que abriron o marcador por medio de Pablo logo dunha acción en banda.

Un tanto que deu tranquilidade aos de Narón pero que non impediu que o equipo visitante o seguira intentando a través dun bo xogo colectivo pero que se atopou coas boas accións de Iker, que desbaratou todos os intentos por igualar o marcador. Con vitoria pola mínima do Cidade se chegou ao descanso.

Durante o segundo tempo o Cidade de Narón tirou de oficio para seguir controlando o choque, mentres que o Bueu seguiu intentando xogar a pelota con ataques bastante elaborados, pero que se volveu a atopar cun Iker baixo os tres paos que non concedeu.

E cando semellaba que o partido entrara nunha fase de letargo, dúas boas accións de Lucas, o xogador máis incisivo do Cidade nesta xornada, fixeron que Bueu tivera que repregar liñas e na terceira acción individual, o naronés conseguiu dun tiro exterior poñer o 2-0 no marcador.

O Narón se atopou cómodo con defensa en media cancha e sen pasar maiores apuros, malia que o Bueu intentou aproximarse varias veces para recortar distancias. Pero ante a falta de oportunidades claras, os de Pontevedra decidiron cambiar de estratexia e apostaron polo xogo de 5 para 4.

E nas primeiras de cambio, o equipo local aproveitou para roubar a través de Lucas que puxo o 3-0 e deixou sentenciado un partido no que o visitante seguiu intentándoo con porteiro-xogador e o Cidade alternou a defensa en media cancha e a presión. Pero un desaxuste en defensa no último minuto permitiu a Bueu marcar o seu único tanto no choque.

O resultado desta fin de semana permite aos de Narón continuar coa racha de vitorias que o sitúan na zona medio-alta da táboa e que agardan prolongar o vindeiro fin de semana, no que o Cidade volverá a xogar na Gándara ante o Stellae-Leis Pontevedra B.

Ficha técnica:

Cidade de Narón: Iker, Miguel, Diego, Lucas e Héctor. Tamén xogaron Manu Tenreiro, Iván, Lautaro e Pablo

ADFS Bueu: Marcos, Eloy, Pablo, Marco e David. Tamén xogaron Sandro, Rodrigo, Daniel e Javier.

Goles: (1-0) min. 19, Pablo; (2-0) min. 27, Lucas; (3-0) min. 35, Lucas; (3-1) min. 38, Marco.

Árbitros: Juan Ramón Juan Mora e Nicolás Villegas Sordo (C.T.A. Galego).

Pavillón: Pavillón Municipal da 

 

Gándara (Narón)